كلمات الشهيد يعرب الحسن الأخيرة..
هي رسالة من الشهيد «يعرب الحسن» إلى أمه
كلماته الأخيرة قبل استشهاده دفاعا عن الوطن بريف دمشق..
أمي الحبيبة
بعرف انك زعلتي أني ماقدرت انزل أجازة بالعيد وبعرف انو كل مانزل مطر واشتد البرد بتوقفي عالشباك وبتصيري بتدعي انو الله يرد عني كل شر….
ياأمي أنا منيح لاتاكلي همي….
والله يخليكي لاتضلي توصي رفقاتي فيني…ولو ياأمي أناصرت شب مابينخاف علي…
قاللولي أخواتي انو السنة مارح تعملي حلو بالعيد لأني غايب….
بالله يا أمي لاتحرميهن من أكلاتك….
أنا بنبسط أكتر إذا عرفت انو انتو عايشين حياة طبيعية بغيابي….
أمي :
أنا كتير مشتاق للضيعة وللزيتونات ويمكن السنة تعبتو بحواش الزيتون لأني مو معكن…
أمي قال أنتي صايرة محلله سياسية قد ما عم تسمعي أخبار وسبقتي هلي عم يحللو….عم امزح معك لا تزعلي…
بالله يا أمي كل يوم تشعلي بخور وادعيلي أنا ورفقاتي..
ياأمي انتي ربيتيني أنو الأرض أغلى من كلشي….وانو هالبلد مهما قسيت علينا بتضل أمنا …..لهيك أنا قررت أتطوع…
يمكن بوقته ازعلتي لأني ماخبرتك بس أكيد خلص مانك زعلانة مني بعدما حكولك رفقاتي أني حميتهن أكتر من مرة….
أمي….
سامحيني اذا عصبت عليكي شي مرة…
ولاتنسي تاخدي أدويتك….
بدي لما ارجع عالبيت شوفك متل العاده.. قوية..
صار لازم اختم الرسالة لأن مناوبتي بلشت….
ما بعرف ليش كتبتها عورق يمكن لأنك كنت تقولي انو الورق بيحمل ريحة الغايبين….
بخاطرك أمي ..ادعيلي…
ملاحظة:
الزيتونات الل بعتيهن خلصو …لأنو ابنك ضيٌف الكل ونسي حالو…. بالله ابعتيلي قطرميز تاني….
ابنك المحب
تبقون سراج الياسمين